Plan - B!!!

சிக்கன் லிட்டில் படத்தைப் பார்த்திருப்பீர்கள். அதில் இறுதிக்காட்சியின் போது Plan - B, Plan -C, Plan - D என்றெல்லாம் சிக்கன் லிட்டில் சொல்லும்.

இந்த இடுகை அதைப்பற்றியது இல்லை. ஒரு ஊரில் மனிதக்குரங்கு ஒன்று விலங்கியல் தோட்டத்தில் இருந்து தப்பிவிட்டதாம். அது மிகவும் அபாயகரமான விலங்கு என்பதால் அதனைப் பிடிக்க நகர நிர்வாகத்துடன் இணைந்து விலங்கியல் தோட்ட நிர்வாகமும் ஆங்காங்கே ஒலி பெருக்கிகள் மூலமும், வானொலி மூலமும் பொது அறிவிப்புகள் மூலம் தேடுதலை முடுக்கிவிட்டதாம்.

ஒருவழியாக விலங்கியல் தோட்ட நிர்வாகத்திற்கு நகரத்தின் ஒதுக்குப்புறமான ஒரு வீட்டின் கூரையில் தப்பித்த அந்த மனிதக்குரங்கு நின்று அழிச்சாட்டியம் செய்து கொண்டு இருப்பதாகத் தகவல் கிடைத்ததாம். வீட்டு உரிமையாளரை அமைதியாக இருக்கச் சொன்ன நிர்வாகம், உடனடியாக மனிதக்குரங்குகள் பிடிப்பதில் தேர்ச்சி பெற்ற ஒருவரை அந்த வீட்டிற்கு அனுப்பி வைத்தது.

அக்குறிப்பிட்ட வீட்டின் முன் சற்றே முதியவரான மனிதக்குரங்கு பிடிப்பவரது வாகனம் வந்து நின்றது. அந்த வாகனத்தில் தப்பிய மனிதக்குரங்கை அடைத்து வைக்க வல்ல ஒரு கூண்டு இருந்தது. அவர் கையோடு வாகனத்தில் கொண்டுவந்தவை:
- கெட்டியான தாம்புக் கயிறு
- ஒரு வேட்டை நாய்
- மடங்கிவிரியும் ஏணி ஒன்று
- கைவிலங்கு (a pair of Handcuffs)
- பந்தடிக்கும் ஒரு மட்டை
- ஒரு வேட்டைத்துப்பாக்கி

வீட்டின் உரிமையாளர் ஆர்வ மிகுதியால் இந்தப் பட்டியலில் இருக்கும் கொண்டுவந்த ஒவ்வொரு பொருளுக்கும் உபயோகம் என்ன எனக் கேட்டார். மனிதக்குரங்கு பிடிப்பவர், "முதலில் ஏணியின் மூலம் மேலேறி அங்கு நிற்கும் மனிதக்குரங்கின் மண்டையில் பந்தடிக்கும் மட்டையால் ஒரு போடு போடுவேன்; நிலை தடுமாறி கூரையிலிருந்து மனிதக்குரங்கு தரையில் விழும்; கீழே தயாராகக் காத்திருக்கும் வேட்டை நாய் மனிதக்குரங்கின் பிறப்புறுப்பைத் தாக்கும். அதனால் தன் இருகைகளையும் தொடைகளுக்கு நடுவே மனிதக்குரங்கு கொண்டு வரும் போது நான் கைவிலங்கைப் பூட்டி அதனைக் கூண்டில் அடைத்து விலங்கியல் தோட்டத்திற்கு அழைத்துச் செல்வேன்" எனக்கூறினார்.

வாய்பிளந்து இந்த செய்முறையைக் கேட்டுக் கொண்டிருந்த வீட்டின் உரிமையாளர், "ஒரு விஷயம் புரியலையே" என்றார்.

" என்ன அது ?" என்றார் ம.கு. பிடிப்பவர்.

"எல்லாத்துக்கும் உபயோகம் சொன்னீங்க, அந்த வேட்டைத் துப்பாக்கி எதுக்கு?"

"ஓ அதுவா? அது Plan - B"

"புரியலையே!"

" வேறு ஒண்ணும் இல்லை ஒருவேளை மனிதக்குரங்கு மட்டையைப் பிடுங்கி என்னை ஒரு போடு போட்டு கீழே வீழ்த்திவிட்டால், பாய்ந்து வரும் வேட்டைநாயைச் சுட்டுத் தள்ள!"